grantler.de   asamnet e.v.

ASAM darf Ihnen voller Stolz den kompletten Text von Herbert Kastners <DAU>'s Schwimm-Fibel präsentieren. In der gedruckten Form enthält das Buch noch viele humoristische Zeichnungen zu den erklärten Begriffen.

<DAU>'s Schwimm-Fibel


 

Wer ko/mog scho im <Internet> surf'n?
© Herbert Kastner

Herbert Kastner is as dem däiadn Johrgang 57. Noarmalaweis vadäint ea sei Göld mit'n Programmiern. Füa däi "Amberger Rundschau" hot ea a boar Gast-Grantler gschrie'm.
Däi Zeichnunga san vo seim Weib, meah wead niad varo'n.

Voared

Zerscht woit e iwa des Thema ja an Gast-Grantler macha. I hob a scho äbbs gschrie'm, owa beim Duarchlesn how e mi dann gfrogt, vastäiht des iwahapt nu jeamd. Wäi i imma meahra Sachan erklärn hätt mäin, is däi Idee zua dea Fibel entstandn.
Beim Recherchiern bin e af suvui Unbekannts und Unverständlichs gstoußn, daß mia kloar woan is: Schwimmflügl mäin her!
 
Däi Begriff in "<>" wean erklärt. Däi Abkürzunga bedeit'n:
ad = altdeitsch
nd = neideitsch
sa = siehe auch
 
Des meiste sand nd Translationen ad Iwasetzunga. Däi fach-chinesischn Anglizismen sand scho su im normaln Sprachgebrauch, daß'd oft niad woaßt, obst däi deitsche Schreibweis nu vawendn suist. Andre Wörta sogt oafach koa Mensch. Oda hom si scho amal "Fernverständigung" gheat, owa "Telekommunikation" sicha scho oft. Doa ko ma getrost vo neideitsch sprecha und wenn des su weita gäiht, nau brach ma däi Rechtschreib-Reform in a boar Joahr eh nimma.
E'm suoft kumma Akronyme ad Abkürzunga mitunta gspickt mit lateinische Begriffa voa. Wäi ma des mit derne Abkürzunga, frei nach dem Motto: "In da Kürze, liegt däi Würze", af d'Spitz trei'm ko, is unta <Akronym> noachz'lesn.
 
Vüi an derne Sacha san ja Spüierein. Iwahapt is dea Spüi- und bei su manchn Verbal-Erotika da Sexual-Trieb däi Triebfeda vo dem Ganzn. Des nuztn a boar Seelenvakäufa ungeniert as, indems des <Internet> mit dem Drumherum als wahrs Wunda, ohne demst heint goar nimma le'm kost, opreisn.
Mein Schwoager homs aa hoaß gmacht: "Do kost segn, ob se se in Paris wiederamal staut." "Ja frale", soch e, "ko ma af da <Homepage> von ADAC noachschaugn, waos iwarall an Stau hot.
Owa du haust ja nu koan Compjuta und vo dem andren Grafäzeich kennst niad amal däi Nama. Selbst, wenn ma des äiz ois kaffa, kost di des nu mehra, nämli Zeit und wenn e mia dei Oawat oschaug, ko e mir niad vorstöin, daß du dawal haust."
 
Und nau vazoi e eahm däi Gschicht vo dem Mo, dens zerscht iwas Oktoberfest gführt und dann an Compjuta mit Software vakafft hom. Drei Wocha spauda is dea zou uns kumma und hot gmoant: "Af dern Knobf, wenn e affe druck, dann kummt dahint mei Bilanz assa, hot da Vakäiffa gsagt und i Rindvieh hob des glabt."
Kloar wird dea Mo inzwischn sei Bilanz drucka kinna. Owa ea woas gwiss aa, wos da Spruch: "Mit Geduld und Spucke, fängt man eine Mucke", bedeit.
 
Hier däi zwoa Asschnitt, däi füan Gast-Grantler dacht woan. Äiz kinnts selwa schaun, obds es ohne Fibel vastandn hätt's.
 
Mei Brouda is nach Kanada gfohrn und hot gmoant, mia kunntn iwa <E-mail> in Vabindung blei'm. I hob aa glei sei: "Mia san guad okumma" erhaltn und woit eahm am nächstn Dooch schrei'm.
Blous den Wagrain hot a Bagger radikal vo da Aßenwölt ogschnittn. Koa Telephon, koa Kabelfernseh und des füa knapp drei Dooch. Erscht nau kunnt e mei: "Bei uns is ois beim Altn", loaß wean. Prompt mailt mei Brouda: "Nachricht erhaltn. Komisch, hiwerts hots a boar Stund, herwärts owa 3 Dooch dauert." "Ausnahmsweis is däi <Telekom> niad schuid. A Bagger hot bei uns ganze Oawat gleist", schreib e eahm.
 
A anders Mal woit e däi Zugvabindung vo Nürnberg-Eibach nach Amberg iwas <Internet> erfrogn.
Alsu bin e af däi <Hompage> dea Bahn AG und mit am <Link> af däi Zugauskunft. Af dem <Server> vo da Bahn kunnt e Start-, Ziel-Bahnhof und mei Start-Zeit eige'm. Wäi e dann af a <Reply> gwoart, hob, is nach ca 4 Minutn "System überlastet" kumma und däi Suach is ohne Ergebnis obrocha woan.
 
Wenn e zum Höra griffa und däi Zugauskunft ogruafa hätt, nau hätt e aa erscht duarchkumma mäin, owa wenn e jeamd dro gha't hätt, nau hätt e a Askunft kraigt und niad nuar Gebührn zohlt.
 
Nix füa unguad sogt Herbert Kastner.

Schwimmflügl

Alle re'ns von Surf'n im Internet
und i war scho froah, wenn e a weng mitschwimma kannt.
Wenn's eahrne aa su gäiht, nau ko däi Fibel, wäi a boar Schwimmflügl, behilflich sei.

3D
drei dimensional. Am <Monitor> hot ma nuar zwoa. Dao kost vo links naoch rechts und affe und oi. Owa vo voan naoch hint föit.
Däi Räumlichkeit werd iwa a gschickte <Software> und a geeignete <Hardware> dem Aug vorgaucklt. Gschicht des mit su oana Brüin, däi asschaugt wäi a Astronautnhöim, lenkt, wäi bei de Scheuklappn, nix meah o.
 
Account
Zuagang. Wäi a Hausschlüssl. A nd Guest ad Gast derf amal duarchs Fensta schaugn. Da Gloa kriagt oan füa däi untern, da Grouß aa nu oan füa däi obern Etagen. Da <Sysop> hot den Generalschlüssl, mit eahm kummt ea iwarall hi.
 
Active X
Af deim Rechna wird äbbs glo'n und lafft ohne dei Zuatua o. Des ko bei a boar Buitln nu ammüssant sei, owa wenn a <Hacker> se Göld vo deim Konto hoit, is Schluß mit lustig.
 
Adapter
Kuppla. Brachst, wenns am Anschluß happert.
 
Akronym
Abkürzung. Wennst däi <Online>-Zeit vakürzn wuist, muaßt di kurz fassn und kost sulche Floskln,wäi
"cu" = "see you" = "habedere"
"ROTFL" = "rolling on the floor & laughing" = "Doa legst di nieda & lachst" vawendn.
Mit 3 Zeichn kunnst Gfoin :-)
Missfoin :-(
Augnzwinkan ;-) zeign.
Besser sicht ma, wos gmoant is, wenn ma des Buach um 90° draht.
(Anmerkung der ASAM-Redaktion:
Drehen Sie statt des Buches doch bitte den Monitor)

 
Analog
Klingt wäi antik, su wäi Röhrnvasterka, Schoiplattn etc.
Alle niad ISDN-Apperate san nu su.
 
Animation
Es rihrt se wos. Däi drahradn, hupfadn und blinkadn <Buttons> zwinga mein oidn <PC> regelmäßig in d'Knia.
 
Applikation
a anders Wort füa <Software>.
 
Attach
Ohängsl. A <File> an a Nachricht. Wäi a Bleamlstrauß mit Kortn.
 
BIOS
Basic Input Output System. A <Software>, däi eigentli zuar <Hardware> gheat, oda umkeahrt. Wenn des dei neichs Tail niad kennt, nau is schnöi vorbei mit da Freid.
Im Joahr 2000 wean a boar ältere manch unliebsame Iwaraschung parat haltn.
 
binär
Da Compjuta, oda Konsum, wäi da Opa Löwe zuar dea Kistn sogt, ko niad amal bis drei zöhln. Dea woas eigentlich nua aus, binär 0 und ein, binär 1. Und trotzdem ko dea damit suvui macha. sa digital.
 
Browser
<Software> zum Surf'n im <Internet>. Wäi beim richtign Surf'n brachst aa doa a "gscheits Bredl". Mit dem ko dei <PC> a boar Kunstickl, wäi <HTML>-Seitn darstöin, <Link> ermöglichn etc.
 
Button
Knobf. Druckst affe, passiert wos. Niad imma woaß ma wos.
 
CAPI
Common ISDN Application Programming Interface. Des war aa z'oafach, wennst däi Telephon an derne zwoa Kabln oschliaßast und ois gang wäi vo selbst. Naja, beim Telephon alloa gäihts grod nu. San owa Anrufbeantworta, ISDN-Kortn und Fax baranand, nau mäin däi scho zammpfeifa. Wenn ois richtig <configuriert> is, is a feine Sach.
Bis doahi hoaßts: "Ohne Fleiß, koa Preis" und frog niad, wos des kost.
 
Chat
Gschwätz. Ma vasuacht afm Morkplotz mit jedm, dea daher kummt ins Gspräch z'kumma. Des niad nua afm Amberga sondern aa afm Nürnberga oda dem Roadn Plotz. Wemma da Werbung glabt, is goar däi ganze Galaxie denkboar, ois is ja nuar <virtuell>. Däi Kunst bstäiht äiza niad nuar darin, daß ma oan trifft, sondern daß ea oan aa nu vastäiht und des niad nuar sprochlich.
Gscheiter wars, wemma voaher asmacht, wou ma se trifft. Gschicht des via Fernseh, nau is des wäi a Tailnahm an a Groß-Demo.
 
CD-ROM, -R, -RW oda DVD
Des san däi süwan Schei'm, däis aa in Goid gi't. Bals däi niad gawat, wa su manch afblaosene <Software> goar nimma zu vakaffa.
Zerscht woan däi compact disk ad nuar zun Lesn, nd read only memory.
Nau sans ad oamal bschreibbar, nd recordable, woan. Dea Vorgang hoaßt Brenna, obwohl däi Schei'm goar niad brennan.
Zukünfti weans ad wieda bschreibbar, nd rewritable, sei.
Ob däi digital video disc aa nu bracht werd, werd se zeign.
 
Chip
Däi san niad zum Essn, däi hom Sockl. Mit derne weans in Compjuta gsteckt, damit dea Speichern, Rechnern etc. ko.
 
Client
nimmt se Dienst, däi a <Server> parat hält. Su wäi a Klient an Advokatn.
 
Code
Befehl, Befehlsfoign füan Rechna. Jeds <Programm> bstäiht dras.
Übrigns ad Kot hoaßt nd shit und hot damit nix z'tua. Obwohl manchs Programm scheiße is.
 
Cookies
Bewegungsmelda. Iwasetzt hoaßts zwoar Plätzchen. Owa i woas niad, wos des mit Gebäck z'tua hot, wenn a <Hompage>-Betreiba af deim Rechna wos hintalegt, damit ea beim nächstn Moal gucka ko, wou du beim letztn Moal gwen bist.
Wer den niad asschalt is selwa schuid.
 
Configuration
Oordnen vo Komponentn, Aswahl vo Optionen.
Des is äiamal schlimma wäi beim <3D>-puzzln.
 
CPU
central prozessing unit. Wird heintzudooch als Synomym füa <Prozessor> vawandt.
 
Cyber Cash
virtuells Göld. Du gäihst af a <Homepage> vo am Göldinstitut und hoist da dourt an Cyber Cash. Mit dem gäihst nacha af däi <web-site> vo am <vituell'n Kaufhaus> und orderst dourt äbbs. Zohln tuast mit'm Cyber Cash. Daß du an Cash haust, weißt mit'm <Session Key>, denn'st voaher von Göldinstitut kraigt haust, noach. Su brachst des <Internet> goar nimma valassn.
Ogrechnet wird, wennst dein Kontoaszug oschaugst.
 
Cyber Space
<virtueller> Raum. Dea is mit <3D>-Builda su gstalt, daß'd moanst, du stäihst mittn drin. Dao kost di in Gebäude oda af Plätz bewegn, däi nu goar niad baut san und, wenns oan niad gfalln, amend goar niad baut wean.
Meist wird däi Technik owa beim Spuin eigsetzt. Dao kost nacha zwischn zwoa Eiszeitn, owa bitte mit Sahne, mit d'Saurier kämpfa.
 
Datenautobahn
Highway hoaßts in da Werbung. Owa sulang ma nu däi Kupfaleitung hom, sans äia Trammplpfada.
 
Datenbank
Däi Dat'n san nimma in da Kass, sondan wean af d'Bank bracht. Imma wennst äiz an Diridari brachst, kost niad oafach in d'Kass langa, na du muaßt af d'Bank gäih. Dem <User> is des Wurscht, dea wui sein Automatn. Dea <Programmierer> hot sei Plauch.
 
Datenschutz
Ohne nd watch dog ad virtuelln Ke'enhund niad meah z'garantiern. Besser is ma vazicht af <Aktive-X-Controls>, <Cookies> etc. Mei löwa, nau werds owa füa däi meistn fad.
sa Viren
 
Datentransfer
Iwatrogn vo Dat'n z.B. via <Modem>.
 
DAU
dümmster anzunehmende <User>. Koana is. Jeda kennt oan. Beim <Programmieren> söit an eahn dacht wean, owa jedsmal gi'ts nu an Dümmern.
 
DFÜ
Datenfernübertragung. Is oana vo de wenign altdeitschn Begriff, dea, wenn aa nuar in da Abkürzung, iwalebt hot.
 
digital
<binär>e Schreibweis.
 
Digitale Signatur
Fingaabdruck. In Zukunft langt dea guade Nama nimma. Den Fingerabdruck woins iwa an Sensor lesn. Bis doahi kraigst a Kort'n mit am eindeitig'n und hoffentlich sichan <PIN>.
sa Kryptographie
 
Domain
Internet-Bereich mit eignem Nama und Endung. Beispüi füa Endunga san:
.de = Deitschland
.com = nd commerz ad gewerblich
.edu = nd education ad Bildung
 
Wird vo rechts nach links imma gnaua. Blous in England vakehrns aa doa andersrum.
 
DNS
Domain Name Server. Rechna mit Nama/<URL>- Vazeichnis, wäi a Telephon-Buach.
 
Download
Von <Server> äbbs hoin. sa recieve.
 
E-mail
nd electronic Mail, ad elektronische Post. Niad zou vawechsln mit Email, a wenn vüi von dem, wos dao gschrie'm werd, Blech und iwazogn is.
 
E-mail-Adress
a "Postfach" in am "Postamt", des rund um däi Uhr off hot. Den Zuagang kraigt ma iwa an <Online-Dienst> vo seim <Provider>. Nei schaugn tuat ma via <Modem>, <PC> und <Client>. Däi Adress hot den sel'm Nachtail wäi a Briaf-Kastn: Es mou oana wos neistecka und du muaßt noachschaua, ob wos drin is.
 
Escape
Flucht. Af da Tastatur gi'ts dafüa extra a Tastn. Bei a boar Programme kost nix anders macha, als däi Flucht neihaua.
 
File
ko a <program>, a Datei, a Text, a Buidl etc sei. Däi häufigste DOS-Meldung is: "File not found".
 
Gateway
Einfahrt, Tor. Wenn dei <Provider> su oans hot, kost iwas <Internet> telephoniern.
 
Graphikkarte
Tail dea <Hardeware>. Treibts mitunta bunt.
 
Hacker
Eibrecha, Codeknacka. Des mou ja zu valockend sei, den ach su sichan Code, vo z.B. da d-Box, z'knacka. Äiamal wos ma fei niad, ob ma se doa driwa freia ko. Amend san des däi "Robin Hoods" vo heint, oda stäiht ma doa im Woid?
 
Hardware
Ois wos oan aff'n Fuaß falln ko und nu mehra.
 
Hardware tuning
Afrüstn. Wennst Glück haust, brachst niad glei, beim Hoamtrogn damit ofanga.
 
Homebanking
Du füist z'haus däi Iwaweisungan, natürli nua mit da richtign <Software>, af'm <PC> as. Schickst as <online> an dei Bank. Nimmst dea däi Oawat o. Zohlst Gebührn und trogst as Risiko. Rennst dann zuar Bank und hoist da a Göld, irgendwie clever! sa Hacker
 
Homepage
Visitnkortn und Abhoifach. Normalaweis füa Firma dacht. Mittlawal bastelt a jeda, dea wos göitn wui, an seina. Af dea erfohrst su wichtige Sachan, wäi mei Hobby's san etc.
 
Host
-Rechna. Anders Wort füa <Server>.
 
Hotline
Vo Aßn nia z'reicha. Vo Innen niad amal Zeit füa an Gang, den selbst a Kaiser z'fuaß macht. Äiamal hätt ma gnau su guad des Orakel vo Delphi froagn kinna. Äiamal vastäiht oan koana. Äiamal liegt ma selwa falsch. Meist wird oan owa ghoifa, wos aa niad imma leicht is.
 
HTML
hypertext markup language. Sproach zum Schrei'm vo
ad Web-Seitn nd <web-site>.
 
HTTP
hypertext transfer protocol. Däi meistn <www>-Adressn fanga damit o.
 
Installiern
Eirichtn vo <Software>. Ko ma mitn Packa zuar Urlaubsfoahrt vagleicha. Haust di vahaut, kost ois wieda asm Koffaraum ramma und nuamal vo voan ofanga. Haust Maßl, bringst an Deckl zuar und kost foahrn. Des Asserramma gäiht blous niad bei jedana Software.
 
Internet
Netz vo Compjuta, däi unteranand vabundn san. Jeda Tailnehma hout suwos wäi a Telephon-Nummera. Iwa däi ko ma af a <Homepage> glanga. Däi Vabindung wird iwa meahra Stationen afbaut. Im Gegensatz zum Telephon-Netz mou dea Weg niad imma gleich blei'm. A Erfindung, däi ma am Militär z'verdankn hom.
 
Intranet
Wäi <Internet>, blous eizäunt. Däi Leut woin unta sich blei'm.
 
ISDN
Integrated Servis Digital Network. Däi Dat'n wean zwar imma no duarch däi Kupfaleitung gjagt, bracha owa nimma quetscht wean. Wemma da Werbung glabt: "Immer schnell durchs Netz".
sa <Modem>.
 
JAVA-Applet
<Animation>. Äiamal wäi däi Leuchtreklam vo Las Vegas
 
Kommunikation
Vaständigung. An dea happerts meistns. Däi Rechna hom dafüa <Protokoll>e. Wern däi alle eighaltn und san däi <port>s richtig <configuriert>, nau vastenga se däi Rechna.
Vo de <User> ko ma des nu lang niad sogn.
 
Kryptographie
Vaschlüsselung. Bisher hot des blous da Geheimdienst bracht. Owa wennst heint dei Göldgeschäfta <online> varichtn wuist, söitn däi scho voa <Hacker> sicha sei.
Denk dro: Woas a Mensch se aa asdenkt, omal knackts da anda.
 
LAN
Local Area Network. Lokal-begrenzta Vabund vo Rechna.
sa WAN.
Däi, däi blous nu vo WAN nach LAN schaugn, mäin däi <ESCAPE>-Tastn drucka, bevours an Wahn kraign.
 
Link
Quervaweis. A Mouse-Klick af'm foalschn <Button> und du haust a Waschmaschin. Goar su wuid is niad.
 
Live-Bilder
Sogn ma a Moal von Christ-Kindla's-Morkt. Des Build wird, je nach <Rechna-Leistung>, meah oda weniga schnöi afbaut. Ma erkennt, wäi af oana Postkortn, däi Budn und dazwischn is je nach Tageszeit a meah oda minder dichts, graus Menschnmeer.
Erkenna, selbst wennst oan kennast, kost fei doa drauf näemd. Ma sicht aa niad, ob da Glühwein, däi Broatwurscht, da Lebkuacha etc. schmeckan.
Eigentlich fallt oan nuar däi bunte Eikafftütn af. Wenn ma äiz lang gnua draf bleibt, nau ko ma a boar Builda nachanand oschaugn. Je nach Rechna wean däi Builda meah oda minder schnöi nachanand afbaut, bei mia woa des alle halbe Minutn. Su ko ma äiz dern Weg vo dea buntn Tütn duarch däi Budengass vafoign.
I moan, des is füa däi dacht, däi Europa an oan Wochend macha und dahoam af eahrne Builda schaugn, woas äiz iwarall woan. Des erklärat aa, warum suvüi däi Marsbuilda oschaugn hom mäin, wal doa kinnas nu niad selwa hifoahn.
 
Login
Eistempeln. Stempelkortn is dea <Account>.
 
Logout
Asstempln.
 
Mailing Liste
Abonnement-Vazeichnis. Doa loaßt ma se eitrogn, wemma af'm Laffendn sei wui. Äiz mou ma blous nu wissn wer wos woaß.
 
Motherboard
Tail dea <Hardware>. Nimmt andre Taile, wäi <Chip>s und Kortn, in ihre <Slot>s af. Deszweng Muada?
 
Message
Nachricht, Botschaft. Es gi't wenig Messiase. Däi meistn woin nua unsa Bests: unsa Göld.
 
Modem
Grät, des vo <analog> nach <digital> und umkeahrt moduliert/demoduliert. Des ko ma se ungefähr su vorstöin:
Däi Dat'n asam Compjuta wean vo dem Grät quetscht, daß duarch däi kupfane Telephonleitung bassn. Dream weans vo am zwoatn Grät wieda asanander zogn.
Dea Fachmo woaß, daß des gnau umkeahrt is, owa a su loaßt se se leichta erklärn und vorallem aa maaln. Tatsächlich wean dafüa jede Menge <Protokoll>e bracht.
 
Monitor
Dea sichtbare Tail dea <Hardware> af dem fast jeda wos sicht. A Grät mit Her(t)z und Format und wenn däi Aflösung a nu stimmt, naucha ko goar nix meah passiern.
 
Multimedia
Builda, Tön und Video. Ois füa Aug und Ohr. Godd sei Dank nu niad füa d'Nosn.
 
Newsgroup
Diskussionsforum. Wos neis wui ma erfohrn, owa schnöi wird ma zua gmüllt.
 
Offline
Taxometer stäiht. Dein Koffa bzw. dei <Message> kost scho vorhea packa. sa Packer
 
Online
Taxometer rattert. Däi <Telekom> freit se.
 
Online-Dienst
Mit dem ko ma des Tor zuar Wölt afmacha:
Im <Internet> surf'n, <E-mail> schicka und kraign etc.
Glabt ma da Werbung san des lauta neccesäre Sachan.
 
Packer
Komprimierer. Im <Multimedia> Zeitalter af alle Fäll notig. Wal mit a boar Buidln, Videosequenzn oda Musistickl dei Festplattn sunst schnöi zua knallt is. Aßerdem ko ma damit däi <online>-Zeit vakürzn. sa offline
 
Passwort
Parole. Ohne kummst niad eini. Derf niad z'oafach, söit owa aa niad z'kompliziert sei. Sunst hot ma se schnöi selwa asgspierrt.sa Kryptographie
 
PC
personal Compjuta. Freind und Hund vareckta. Is scho Wahnsinn, woas ma mit dem ois macha ko. Doch äiamal treibt oan däi Kistn schier zuar Weißgluat. Es gi't koan peniblern Hund, selbst däi Bitt:
"Do whot I mean, not whot I say". loaßt den koid. Dafüa hot er se scho su manchs Schimpfwort ohörn mäin. A Mensch redet koa Wort meahra mit oan.
 
Peripherie
Ois wos am <PC> nu su tro hängt, wäi Drucka, Scanna, Fax etc. Wahre Alleskönna, vaspricht däi Werbung.
 
PIN
personal ident number Geheimnumma sa digitale Signatur
 
POP
Point of Presence, Eiwählknotn. Soit in da Näh sei. sa online
 
Port
Ein- oda Ausgang des Compjutas. Ko parallel oda seriell und mou richtig <configuriert> sei. A andre Iwasetzung is Hafn. Doazua fallertn mia däi Irrfohrtn des Odysseus ei...
 
Programmieren
däi Kunst oana Maschin des macha zou laun, wos dea <User> wui.
 
Programmierer
söit stets an den <DAU> denka.
 
Protocol
TCP/IP Transmission Control Protocol, Internet Protocol und FTP File Transfer Protocol.
Godd sei Dank woaß ma niad, wos dao su ois hinta de Kulissn olafft. Sama froah, daß se däi <PC> untaanand vastenga.
sa Kommunikation
 
Provider
vo dem kraigst a Leistung füa Göld. Obsas wert woa, woaß ma meist erscht hintaher.
 
Prozessor
Herz oda Motor von Rechna. Ko goar niad schnöi gnua sei. A Zwölfzylinda ohne des richtige Drumherum is owa aa nix.
Obs a Ferrari sei mou, mou jeda selwa wissn. Füa mi is a af alle Fäll z'schod und vorallm z'tejer, um damit jedn Dooch in d'Oawat
z'foahrn. sa Rechnaleistung
 
Ranking Dienst
Bewertung. Des wos däi Maschin am äiastn füa des halt, wos du wuist, stäits ganz o'm hi. Daß se des mit deina Vor-stellung deckt, grenzt scho an a Wunda. sa robots
 
Rechnerleistung
Wäi beim Auto hängt däi niad nuar von Motor/
<Prozessor>, sondern aa von Fohrwerk/<Graphikkart'n>, Festplatt'n etc. o. sa Prozessor
 
Reply
Antwort, Ergebnis. Du frogst däi Maschin und kraigst aa a Antwort, owa des Ergebnis is glei Null. Wos e damit moan, ko ma in da Voared noachlesn. Doa guit aa: "Es gi't koa dumme Frogn, blous dumme Antwortn.
 
Robots
Suachmaschin. Wennst niad gnau woaßt, woast suacha muaßt, kost des am elektronischn Noachschlogwerk macha laun. Des Ergebnis schaut as, wäi da Weddabericht: zou 80%, zou 60% oda blous zou 40% trifft des, wost kraigst, zua. In a Reihenfoig, wäis däi Maschin moant, wirds mit'm <Ranking Dienst> bracht.
Wennst amal a Reklame kraigst, däi mit dem wost du hom woitst, goar nix z'tua hot, kost unta <Spam> noachlesn.
 
Router
Pfadfinda. Suacht dern richtign Weg im <Internet>, bals oan gi't. sa URL
 
Session Key
a temporära Schlüssl. Wird z.B. füa <Cyber cash> bracht.
 
Server
meist Rechna. Hält Dienst, wäi früja as Freilein von Amt, parat. Däi ko a <Client> oruafa.
 
Shareware
<Software>, däi oan zuar Vafügung gstöit werd. Ma kos voam Kaffa erscht amal richte Testn. In Deitschland san vamutli däi gründlichstn Testa, wal zun Kaffa kumma däi wengstn.
 
Slot
Schlitz. Däi Steckplätz von <Motherboard> hoaßn su.
 
Software
Weichtail. Ohne gäiht af'm <PC> nix. Söit ma in brauchbar, im Sinne vo z'bracha, und unbrauchbar eitailn. Des is goar niad su oafach.
Oft passierts, daß ma nach'm <Installieren> froah is, wemma däi Problem glöst hot, däi ma ohne goar niad gha't hätt.
 
Spam
unerwünschte Werbung. Däi <robots> wean astrickst. Däi
meistgsuachtn Schlagwörta wean dea Reklame vora gstöit. Däi Maschin, liest den Rest natürli nimma, sondern freit se, bals wos gfuna hot.
 
Spoof
Schwindel. Normalaweis bist ja im <Internet> anonym. Blous ab und zua muaßt di asweisn. Und doa zeign oa gfälschte Päss.
 
Support
moralische Untastützung. Da östreichische Luftwaffn-Chef soi äiamal gsogt hom: "Owa däi moralische Wirkung woar ungeheierlich." Su is doa a ungefähr.
 
Sysop
Systemoperator. Schiabt a ruhige Kugl, solang dea <Server> lafft. Ko sa däi Hoar raffa, wenn a ogstirzt is, wal dao wui bstimmt jeda äbbs.
 
Telekom
is koa Monopolist meah, moant owa, ea ko se nu su affihrn. Bei de Hausanschlüß wird eas a blei'm, su mäin ma nu a Wal mit da Kupfaleitung le'm. sa Datenautobahn
 
Treiber
sorgt dafüa, daß dei <PC> mit'm <Hardware>- Tail wos trei'm ko.
 
Update
af den neiestn Stand bringa. Dao baust in des <Programm> däi neiestn Sachan ei. Schaugst, daß's schnöia, oafacha und zuavalässiga wird, owa wos sicht da <User> blous: däi neia Fölla.
 
Upgrade
Afwertn. Wäi <Update> blous nu krawotischa.
 
Upload
Dat'n schicka.
 
URL
uniform resource locator. Komplette Adress oana <web-site>.
 
User
da Mensch voa da Kistn. Freit se wäi a Schellnkini, wenns hihaut. Fluacht und würd am liabstn in d'Tastatur beißn, wenn a a bormoi <installiern> mua.
Voweng Plug & Play, scho äia Plug & Pray.
 
Utility
Hilfsprogramm. Füa mei Muada is a Kichnmaschi a assegschmissns Göld. Raspeln und Hobln tuats mit'n Reibeisn und zum Knetn nimmts ihrn oidn Mixa. Mit derne Programme is grod aasu. Sie söitn oan helfa, owa vui san oafach z'kompliziert.
 
Viren
däi Geißl des <PC>. Asdenkt vo mea oda minda krimineie <Programmierer>. Bei de harmlosn wean an bstimmte Dooch, Freidooch dem 13. oä, z.B. däi DDR-Hymne gspuit. Däi andren zastörn Dat'n, des is goar niad lustig.
Drum guit aa doa des Gebot: ungschützte Kontakte vamei'n!
 
Virtual
Ois existiert nuar meah in da Vorstellung. Platonisch, blous Süaßhoiz raspln und sunst nix, is bstimmt niad des Wahre. Owa des Ganze virtuell, doa sichst niad amal meah, mit wemst es z'tua haust. Des ko blous meah wos füa ganz Asbichte sei.
Stöit d'Bea im Vaitl Biergortn a Weizn voa mi hi, des is mei löists wirtuell.
 
Virtual Reality
a Wirklichkeit, däi nuar in da Phantasie existiert. Des is vo haus as wiedasprüchli. Wos ma vo a Probefohrt af da Couch haltn sui, mou jeda selwa wissn. sa <Cyber space>
 
Virtuelles Kaufhaus
nd virtual warehouse oda Shop. Wennst nimma umschua muaßt, wennst in Sexshop gäihst, is scho praktisch. Owa a grouß Kaufhaus am kloana Buildschirm duarchforstn, nitzt sicha nuar da <Telekom>.
 
WAN
Wide Area Network. Is fast wäi bei Inter- und Intra-net.
sa <LAN>
Däi, däi blous nu vo WAN nach LAN schaugn, mäin däi ESCAPE-Tastn drucka, bevours an Wahn kraign.
 
Web-site
ad Web-Seite. Bildschirm-Seitn asam <Internet>. Jede <Homepage> is oane, owa niad jede web-site is a Homepage.
 
www
world wide web. <Internet>-Dienst. Mit eahm kummt ma af a <web-site>. Spötta sogn a: "world wide wait"

Noachred

Füa an Oberpfälza, dea im Franknland owat, is goar niad su oafach sein Dialekt z'bhaltn. Söit e äiamal ins Fränkische oglittn sei, nau sechts mas noach.
Ansunstn mou e zuage'm, daß e bei andre und hauptsächli bei da "Hölle Margret" gspickt hob. A "Vagöits Godd" aa an "Lauerer Toni", wal ohne sei Vorbuild hätt e mi wahrscheinli niad traut.
A grouße Huif woa aa des "Kleine Oberpfälzer Wörterbuch" von "F.X. Judenmann".
 
Schäi langsam kumm e in däi Mundart wieda eine, mit dem Ergebnis, daß mi af da Oawat koana meah vastäiht.
Oans vastäih i niad, wos hot eigentlich Compjuta, Telephon-Leitung etc mitn Surf'n z'tua? Bal mia des oana sochat, war e froah, wal e dann niad bläd ster'm mäißt.

grantler.de   asamnet e.v.